domingo, 2 de junio de 2024
A directora da Axencia Galega de Innovación, Patricia Argerey, compareceu esta mañá no Parlamento de Galicia para explicar a nova folla de ruta que guiará a política de I+D+i de Galicia ata 2027: a Estratexia de Especialización Intelixente (RIS3) de Galicia. Esta estratexia, que foi presentada publicamente o pasado mes de marzo despois de ser aprobada polo Consello da Xunta (abril 2022) e pola Comisión Europea (decembro de 2022), aspira a impulsar a transformación territorial de Galicia en base á I+D+i, afrontando os retos globais desde as especificidades territoriais a través dunha planificación a longo prazo consensuada a través dun amplo proceso participativo que garanta un impacto real da I+D+i e o seu efecto transformador no tecido produtivo e na sociedade.
Argerey apuntou que a finalidade da Estratexia é impulsar o desenvolvemento económico de Galicia empregando a investigación e a innovación como panca tanto para mellorar a competitividade das empresas como para dar resposta ás necesidades das persoas e da sociedade.
Neste sentido, a RIS3 constitúe unha oportunidade para seguir afondando na especialización intelixente de Galicia, iniciada no ano 2014 coa primeira Estratexia de Especialización Intelixente de Galicia (2014-2020). Para iso, a Estratexia identifica os retos e prioridades nos que concentrar as capacidades, esforzos e investimentos en coordinación co tecido produtivo co obxectivo de crear vantaxes competitivas mediante o desenvolvemento das fortalezas de investigación e innovación. Isto é, identificar os ámbitos nos que Galicia é excelente para especializarse naqueles que poida ser competitiva a nivel estatal e internacional.
Deste xeito, a RIS3 dá continuidade aos tres grandes retos establecidos na anterior estratexia (un modelo de xestión dos recursos naturais e culturais baseado na innovación; un modelo industrial sustentado na competitividade e o coñecemento; e un modelo de vida saudable e o envellecemento activo da poboación) e integra dun xeito transversal tres prioridades aliñadas coas da Unión Europea: a sustentabilidade, a dixitalización e o enfoque cara ás persoas.
Argerey destacou tamén que este labor de identificación se levou a cabo a través dun amplo proceso participativo, que se manterá ao longo de toda a gobernanza da Estratexia, no que se involucraron máis de 800 representantes de 500 entidades, entre pemes, empresas tractoras, universidades, centros de coñecemento e tecnolóxicos, a Administración e a propia sociedade. Así mesmo, informou de que todos os departamentos da Xunta con actuacións en materia de I+D+i participaron tamén a través da Comisión Interdepartamental de I+D+i para coordinar os seus instrumentos e actividades.
En definitiva, Argerey concluiu que se trata dunha estratexia deseñada en conxunto cos axentes do sistema galego de I+D+i, adaptada ás esixencias do contexto actual e á vontade de que Galicia siga avanzando para situarse entre as rexións máis innovadoras. Para elo, céntrase nas persoas, apostando polo talento e prestando especial atención igualdade de oportunidades no ámbito da I+D+i, fortalece a excelencia da investigación e a transferencia de coñecemento como elementos vertebradores do ecosistema e posiciona a Galicia como un territorio atractivo a nivel internacional en materia de I+D+i.
Ademais, a directora da Axencia Galega de Innovación destacou que se trata dunha estratexia enfocada cara ás pemes, que constitúen máis do 99% do tecido empresarial de Galicia. En consecuencia, a nova RIS3 impulsa de forma especial o incremento no número de empresas innovadoras. En canto ao orzamento, estímase a mobilización de preto de 5000 millóns de euros de investimento público-privado, un 170% máis que no anterior periodo.
Misións, un novo instrumento con potencial transformador
Entre os instrumentos que se despregarán no marco da nova RIS3, a directora da Axencia Galega de Innovación salientou o das Misións, polo seu potencial para xerar impacto transformador na economía e na sociedade. Trátase dunha nova liña de apoio a grandes proxectos estratéxicos con capacidade tractora sobre o ecosistema de innovación, que permitirá orientar a investigación e a innovación cara á solución de problemas da industria e do territorio.
Estas misións, que serán seleccionadas polos propios axentes do ecosistema, teñen un enfoque de cadea de valor, isto é, que todos os sectores e etapas da I+D+i con implicación nos distintos elos da cadea de valor poderán contribuír a elas. As misións materializaranse en dúas convocatorias (en 2023 e 2025) a través das que se financiarán un número de entre 2-6 misións cun orzamento de 30 millóns de euros de fondos FEDER.
Tivo lugar a entrega de distintivos Q e S de Calidade Turística 2024 da Axencia de Turismo de Galicia. Este ano entregáronse 53 novas distincións Q de Calidade e 39 S de Sostibilidade. Actualmente, Galicia é a segunda comunidade autónoma con máis distintivos Q e a cuarta de distintivos S. O sector turístico galego atravesa un dos seus mellores momentos, con cifras récord no 2023 e cada vez máis diversificado e desestacionalizado, e con máis de 1,3 millóns de viaxeiros que se aloxaron nos establecementos turísticos galegos nos primeiros catro meses do ano e á crecente tendencia á internacionalización do destino, cun crecemento do 5% do número de turistas estranxeiros que se aloxaron en Galicia no que vai de ano.
Un total de 106 universitarios que remataron os seus estudos no ano 2023 veñen de ser galardoados cos Premios fin de carreira pola súa excelencia académica. Así o recoñece a Xunta de Galicia, que publica hoxe no Diario Oficial de Galicia (DOG) a resolución con estas distincións. O 62% do alumnado recoñecido son mulleres e, do total de galardoados, 52 pertencen á Universidade de Santiago de Compostela, 35 á de Vigo e 19 á da Coruña. Os mellores expedientes distribúense entre 64 titulacións nos diferentes campus.
